Tuladha Pawarta Bahasa Jawa

1. Pangertene Pawarta

Pawarta yaiku lapuran ngenani kedadeyan nyata kang aktual, kedadeyane ora dinuga, lan narik kawigaten wong akeh. Kadadeyan utawa prastawa kang diwedharake iku awujud kadadeyan saben wektu sing ana ing donya iki, umpamane: lindhu (gempa bumi), perang, banjir, lan liya-liyane. Pawarta bisa diandharake ana ing ariwarti utawa koran, ing kalawarti utawa majalah, bisa digiyarake ana ing radhio, lan bisa digiyarake ana ing televisi. Malah ing jaman kang teknologine wis maju kaya saiki, pawarta apa wae bisa digoleki lan ditemokake ana ing internet.

2. Titikane Pawarta

Ora saben prastawa utawa kadadeyan bisa didadekake lapuran pawarta, ana saperangan titikan (ciri-ciri) kang kudu dipepaki supaya kadadeyan utawa prastawa kasebut bisa ditulis minangka pawarta. Ing ngisor iki ciri-cirine pawarta:

1.    Aktual

Informasi sajrone pawarta iku njlentrehake kadadean sabenere, cetha, lan dadi omongan wong akeh.

2.    Ringkes lan cetha

Informasi sajrone pawarta nganggo basa kang ringkes, cetha, lan gampang dimangerteni.

3.    Narik kawigaten

Informasi sajrone pawarta kudu narik kawigaten lan ngandharake bab kang disenengi sing maca.

4.    Apa anane

Informasi sajrone pawarta iku dijlentrehake apa anane, ora ditambah utawa dikurangi, cocog karo kadadean sanyatane.

3. Unsur Pawarta

Saliyane iku, pawarta kudu ngemot unsur-unsur 5W+1H (apa, sapa, ana ngendi, kapan, geneya/kena ngapa, lan kepriye) supaya pawarta kuwi diarani jangkep informasine. Unsur-unsur 5W+1H kuwi kalebu unsur-unsur sing baku tumrap teks pawarta. Ing ngisor iki panjlentrehane unsur 5W+1H.

1.    Apa utawa what

Perangan Iki ngrembug babagan apa sing dadi punjering pawarta utawa informasi apa sing arep diwartakake. Unsur iki uga ngandharake kedadeyan utawa prastawa apa sing dadi punjering pawarta sing ditulis.

2.    Sapa utawa who

Sapa ana ing kene ateges paraga-paraga kang nindakake prastawa. Paraga kang ana sambung rapete karo prastawa utawa kedadeyan sing didadekake pawarta.

3.    Ana ngendi utawa where

Unsur iki biyasane ngrembug babagan papan panggonan dumadine prastawa sing diwartakake. Papan panggonan iki kudu diandharake kanthi jangkep supaya para pamaca pawarta ngerti kanthi jangkep lan ora dadi seling-surupe pemanggihe para pamaca pawarta, amarga ana saperangan papan panggonan utawa daerah sing nduwe jeneng nanging panggonane beda. Dadi unsur papan panggonan iki kudu kaandharake kanthi jangkep, kalebu jeneng desa, jeneng kecamatan, jeneng kabupaten, yen bisa nganti jeneng provinsi.

4.    Kapan utawa when

Unsur iki ngrembug bab wektu dumadine prastawa utawa kedadeyan kang ditulis ana sajroning pawarta. Wektu kedadeyan iki lumrahe ditulis nganggo dina, tanggal, sasi, lan taun dumadine prastawa utawa kedadeyan sing diwartakake ana sajroning pawarta.

5.    Kena apa utawa why

Ngandharake babagan alesan utawa sebabe prastawa utawa kedadeyan kuwi dumadi. Amarga ora mokal saben prastawa utawa kedadeyan mesthi ana sebab sing njalari kedadeyan kuwi dumadi. Tuladhane, ana tabrakan neng ndalan kang disebabake sopir ngantuk.

6.    Kepriye utawa how

Perangan iki ngandharake prastawa kanthi jangkep, wiwit saka runtut-runtutaning prastawa utawa kedadeyan, panyebabe, nganti kepriye pungkasaning prastawa utawa kedadeyan sing dilapurake dadi sawijining pawarta. Tuladhane pawarta kang ngandharake babagan upacara Kirab Malem 1 Suro ana ing Kraton Surakarta, kamangka bakal karembug babagan tata lakuning upacara, wiwit persiapan, wektu diadani upacara Kirab Malem 1 Suro nganti pungkasaning acara kang lumaku.

 Tuladha Teks Pawarta: 

Banjir Nrajang Trenggalek 

Bupati Trenggalek Emil Elestianto Dardak ngirim pesen ringkes marang kantor berita Antara, ngandharake yen wis dumadi prahara lemah longsor lan banjir bandhang. Lemah longsor lan banjir bandhang nrajang telung kecamatan ing kabupaten Trenggalek, yaiku kecamatan Munjungan, Gandungsari, lan Kampak.

Prahara banjir bandhang lan tanah longsor mau kelakon ing dina Selasa, 16 Agustus 2016 pukul 22.00 WIB, sawise udan deres meh sedina sewengi ora leren. Prahara lemah longsor kang nggawa korban jiwa 1 asal desa Senden Kecamatan Kampak, lagi surut lan bisa ditangani ing ing dina Rabu, 17 Agusutus 2016.

Prahara banjir bandhang medhotake kreteg ing dalan sing ngubungake kecamatan Kampak-Munjungan lan Kampak-Gandusari uga ngrendhem ewonan omah. Pedhote kreteg mau nyebabake bantuan kanggo korban prahara banjir bandhang sing diliwatake BPBD ora bisa dikirim kanthi lancar.

If you wanna copy my stories, you must include the source. Be a good people, arigatou~