Sesorah FTBI 2025

Berikut ini akan saya tampilkan naskah sesorah yang digunakan siswa untuk mengikuti lomba FTBI di tahun 2025. Semoga bermanfaat dan bisa digunakan sebagai referensi mengajar bapak/ibu guru maupun belajar para siswa siswi di sekolah. 

1. Sesorah tema "Pakulinan Urip Sehat"

Kulanuwun

Assalamu’alaikum wr.wb.

Ingkang kinurmatan para dewan pambiji adon wasis sesorah Basa Jawi

Bapak, Ibu, saha Prakanca sedaya ingkang tansah winengku ing karahayon

Ingkang kaping setunggal, sumangga kula dherekaken munjokaken raos puji syukur dhumateng Gusti ingkang Murbeng Dumadi, awit sih kanugrahan ingkang sampun dipunparingaken dhumateng pajenengan sedaya dalasan kula. Satemah panjenengan sedaya lan kula saged kempal wonten ing papan punika kanthi wilujeng nir ing sambikala.

Ingkang kaping kalih, kula ngaturaken sembah nuwun dhumateng sedaya panitia ingkang sampun ngrancang kagiyatan ing dinten punika kanthi edi peni. Mugi-mugi adicara “Festival Tunas Bahasa Ibu Tahun 2025” kalampahan kanthi lancar awit saking seleksi tingkat kitha samenika ngantos samangke dumugi tingkat provinsi dalah tingkat nasional. Aamiin Yaa Robbal ‘Aalamiin.  

Bapa saha ibu dewan juri ingkang satuhu bagyamulya, ing kalodhangan punika kula badhe matur sesorah kanthi irah-irahan “Pakulinan Urip Sehat Salebeting Kulawarga.”  

Kesehatan menika boten namung gayut kaliyan rumah sakit punapa dene obat-obatan kemawon. Ananging, kesehatan menika ugi gayut kaliyan solah bawa ingkang dipunkulinakaken wonten saben dintenipun. Wonten ing kahanan samenika, kathah tiyang ingkang boten njagi pakulinan sehat ing saben dintenipun.

Para rawuh ingkang kula kurmati, kesehatan menika ugi dados modal utami kangge ibadah, nyambut damel, sinau, saha kangge nindakaken sedaya kagiyatan ing saben dintenipun. Pakulinan sehat samenika saged dipunwiwiti saking lingkungan kulawarga, kadosta:

1.     Pakulinan Dhahar Ingkang Becik/Sehat

Dhaharan ingkang dipunkonsumsi saben dintenipun menika saged mangaribawani dhateng jasmani dalah rohani. Awit saking samenika, sumangga saben dintenipun saged konsumsi dhaharan ingkang halal lan langkung becikipun ingkang ngemot gizi. Ampun asring konsumsi dhaharan instan ingkang saged mbebayani jasmani utawi badan.

Awit samenika, saged dipunkulinakaken konsumsi buah saha sayur ing griya, dipunkirangi jajan chiki utawi jajanan sanese ingkang instan. Ugi, langkung wigati menawi asupan gendhis saha saremipun dipunkirangi kanthi cara mangsak piyambak satemah bab menika saged dipunkontrol piyambak. Ampun ngantos boten kulina sarapan ingkang sehat, amargi sarapan menika dados sumber energi kangge miwiti kagiyatan saben dintenipun. Ingkang boten kalah wigati inggih menika toya pethak. Sumangga dipunkulinakaken ngunjuk toya pethak 2-3 liter saben dintenipun, langkung becikipun dipunsingkiri minuman kaleng lan ingkang ngemot pemanis buatan.

2.     Olahraga utawi Kagiyatan Fisik

Olahraga menika saged ndadosaken badan sehat saha boten gampil sakit-sakitan. Menawi males-malesan utawi mageran menika malah andadosaken badan gampil sakit lan imun badanipun lemah. Ampun namung remen rebahan, scroll medsos punapa dene nge-game ngantos boten ngelingi wekdal.

Langkung becik bilih saben dinten menika nindakaken olahraga. Olahraga menika boten awrat, saged awujud mlampah-mlampah, sepedhahan, jogging punapa dene senam. Saben dinten saged dipunlodhangaken wekdal kangge olahraga, udakara 15 ngantos 30 menit.  

3.     Ngaso ingkang Cekap

Badan utawi jasmani menika mbetahaken ngaso. Miturut panaliten, badan tiyang gesang menika kedah ngaso 7 – 8 jam saben dintenipun. Tiyang ingkang asring begadang utawi jarang tilem menika gampil dipuntempeli penyakit, kadosta penyakit jantung, darah tinggi, obesitas, lan sapanunggalanipun. Pramila, sumangga sami ngemutaken kulawarganipun supados jam ngasonipun cekap saben dintenipun.

Minangun pakulinan sehat samenika inggih mbetahaken wekdal saha konsistensi. Sumangga dipunwiwiti saking dhiri pribadhi lan kulawarganipun piyambak-piyambak pakulinan sehat ingkang sampun kula andharaken kalawau. Kanthi 3 lampah alit kalawau, inggih menika pakulinan dhahar sehat, olahraga, saha ngaso ingkang cekap mugi-mugi saged andadosaken badan sehat.  

Esuk-esuk mangan cakuwe

Aja lali kopi sandhingane

Pakulinan sehat aja dilalekne

Mugi urip sehat salawase

Mugi sesorah kula ingkang sakadhik samenika saged  mupangati saha njalari semangat kangge ngulinakaken urip sehat. Matur nuwun awit kawigatosanipun, cekap semanten anggen kula matur. Sakathahing lepat kula nyuwun agunging samodra pangaksami.

Wassalamu’alaikum wr.wb.

Nuwun

 

2. Sesorah tema "Pakulinan Maos"

Kulanuwun..

Ingkang kinurmatan para dewan pambiji adon wasis sesorah bahasa jawi

Bapak saha ibu sedaya tamu undangan ingkang kula kurmati

Saha kanca-kanca ingkang tansah winengku ing karahayon

Ingkang sapisan, sumangga kula dherekaken munjokaken raos puji syukur dhumateng Gusti ingkang Murbeng Dumadi, ingkang sampun paring kasarasan, kanugrahan, lan kabagaswarasan, satemah kula lan panjenengan sedaya saged kempal wonten ing papan kalenggahan samenika saprelu hangrawuhi adicara “Festival Tunas Bahasa Ibu Tingkat SMP Kitha Surakarta” kanthi wilujeng nir ing sambikala.

Ingkang kaping kalih, kepareng kula wonten ngriki badhe matur sesorah kanthi irah-irahan “Pakulinan Maos Kangge Wiyaraken Kawruh”.

Maos menika boten namung kagiyatan mirsani aksara-aksara. Kanthi ngulinakaken kagiyatan maos, saben lembaran ingkang dipunbikak, saben larik tembung ingkang dipunpirsani, saha saben ukara ingkang dipunpahami, alon-alon bakal lumebet lan rumasuk dados informasi kang nambah wiyaring kawruh.

Lumantar kagiyatan maos, panjenengan dalah kula saged mangertosi bilih kawruh ilmu menika maneka werni. Tuladhanipun, nalika maos buku sejarah, kula saha panjenengan saged mangertosi bab cariyos sejarah perjuwanganipun para pahlawan. Lajeng, nalika maos buku budaya Jawi, saged dipunsinaoni bab adat istiadat, jinis tembang, punapa dene filsafat gesangipun tiyang Jawi. Sanesipun, lumantar maos ugi saged dimangertosi babagan budaya asing saking manca negara, kadosta dhaharan khas tiyang Jepang menika sushi saha wasabi, tiyang Korea remen dhahar kimchi, tiyang Itali remen dhahar pasta, lan sapanunggalanipun.

Para rawuh ingkang bagya mulya,

Nalika tiyang menika remen maos, piyambakipun bakal nggadhahi kawruh ingkang langkung wiyar. Menawi kawruhipun sampun wiyar, tiyang menika ugi badhe langkung wicaksana lan nggadhahi sipat tepa salira. Emanipun, ewadene mangertosi sakathahing mupangat saking maos, nyatanipun literasi ing nagara Indonesia menika taksih andhap. Lapuran saking UNESCO ing taun 2024 ngandharaken bilih minat maos masarakat Indonesia menika namung sangandhaping 1%, ingkang ateges saking 1000 tiyang Indonesia menika ingkang sregep utawi remen maos namung 1 tiyang. Data kalawau dados alarm dhumateng kula lan panjenengan sedaya. Ampun ngantos amargi boten remen maos, lajeng dados tiyang ingkang pitados pawarta hoax ing medsos.

Awit saking menika, sumangga sami nuwuhaken pakulinan maos. Amargi tiyang ingkang remen maos menika badhe nggadhahi pamikiran ingkang langkung kritis, kreatif, saha inovatif. Mugi-mugi kagiyatan maos menika dados bagean saking kagiyatan padinan satemah kula lan panjenengan dados pribadhi ingkang kawruhipun wiyar lan saged nglampahi tantangan zaman ingkang langkung majeng. 

Ingkang kaping pungkasan, kepareng kula ngaturaken parikan.

Kembang ayu rupane biru

Saben dina diencoki kupu

Senenga maca buku

Supaya sugih ilmu

Mekaten ingkang saged kula aturaken, maturnuwun awit kawigatosanipun panjenengan sedaya, nglenggana tebih saking kasampurnan, kirang prigel anggen kula ngrakit ukara, lan tanpa ngirangi suba sita, kula yuwun agunging pangaksama.

Matur nuwun.

Dokumentasi siswa latihan sesorah